Det inneber ein auke på om lag 4,9 milliardar kroner samanlikna med saldert budsjett 2019. Justert for at NRK frå 2020 skal finansierast over statsbudsjettet og for endringar i departementsstrukturen, er auken på 850 millionar kroner eller 6,7 prosent.
– Med dette budsjettet vidareutviklar vi ambisjonen om eit levande kulturliv i heile landet. For å bygge gode samfunn og eit sterkt demokrati som inkluderer alle, treng vi ei brei kultursatsing som legg til rette for utvikling og mangfald. I dette kulturbudsjettet har vi derfor ei sterk satsing på fellesskapsarenaer som kan gi publikum unike opplevingar og kulturlivet moglegheit til å blomstre, seier kultur- og likestillingsminister Trine Skei Grande.
Språk og litteratur er ein viktig del av norsk kulturarv, og ein føresetnad for deltaking i demokratiet. Regjeringa foreslår 9,3 millionar kroner meir til språk i budsjettet for 2020. Samtidig arbeider regjeringa både med forslag til ei ny heilskapleg språklov og ei ny stortingsmelding om språk. Målet er å sikre norsk og å verne og fremje minoritetsspråka som Noreg har eit ansvar for å ta vare på.
Ved å ta i bruk digital teknologi kan ein gjere felles kulturarv og kunnskap om feltet tilgjengeleg for fleire. For å legge til rette og sikre betre tilgang til kulturarven, er det foreslått ein auke i løyvingane til Arkivverket og Nasjonalbiblioteket på til saman 127 millionar kroner.